ٹوکیو ( نیٹ نیوز ) ابھی چند دن قبل کینیڈا اور امریکہ کی فضائی حدود میں پراسرار غباروں کی خبریں پڑھنے اور دیکھنے کو ملیں تو اب جاپان میں پراسرار گیند نمودار ہو گئی ہے ۔ خبر کچھ ہوں ہے کہ ایک پراسرار بڑی دھاتی گیند جاپان کے ساحل پر پائی گئی
جس نے حکام اور شہریوں کو حیران کر دیا۔ہماماتسو شہر کی ساحلی پٹی پر اس گیند کے نمودار ہونے کے بعد پولیس نے بم ڈسپوزل اسکواڈ روانہ کیا لیکن قریبی معائنے کے بعد معلوم ہوا کہ اس سے کوئی خطرہ نہیں ہے۔اس بات کا خدشہ ظاہر کیا جا رہا تھا کہ گیند سمندری بارودی سرنگ ہے لیکن ایکسرے ٹیکنالوجی سے معلوم ہوا کہ گیند اندر سے خالی ہے۔اس کی گولائی ڈیڑھ میٹر تھی اور یہ ساحل اینشو پر آگئی تھی۔گیند پر زنگ لگا ہوا تھا اور اس پر دو ہینڈل بھی تھے جس سے معلوم ہو رہا تھا کہ یہ کسی جگہ پر لٹکائی گئی ہوگی۔جاپانی مسلح افواج اور کوسٹ گارڈ حکام نےگیند کی تصاویر کا جائزہ لیا۔سوشل میڈیا پر لوگوں نے طرح طرح کے تبصرے کیے، کسی نے کہا کہ یہ خلاءسے آئی ہے، کسی نے کہا کہ یہ چین کا جاسوسی غبارہ ہے۔
