امریکہ کو ہٹلر کے نظریاتی پیروکاروں سے خطرہ

نیویارک ( نیٹ نیوز ) سینٹرل انٹیلی جنس ایجنسی (سی آئی اے) کے سابق سربراہ کے صاحبزادے ڈینس ہیلمز نےبرطانوی میڈیا سے انٹرویو میں  انکشا ف کرکے ہلچل مچا دی ہے۔ہیلمز نے امریکا میں ہٹلر کے نظریاتی پیروکاروں کی طرف سے انتہاپسندی کے خطرے سے آگاہ کیا ہے۔ان کے والد رچرڈ ہیلمز 1966 سے 1973 تک سی آئی اے کے سربراہ تھے۔ڈینس نے کہا ہے کہ ان انتہاپسندوں کو تاریخ کا کوئی علم نہیں، نیو نازیوں کی موجودگی سے زیادہ بری کوئی چیز نہیں۔یہ بات انہوں نے برطانوی اخبار سے گفتگو کرتے ہوئے کہی۔ ان کا انٹرویو ’ڈی ڈے‘ کے 79 برس مکمل ہونے پر لیا گیا۔ڈینس نے کہا

کہ یہ بہت تکلیف دہ بات ہے کہ اس ملک میں اب بھی ہٹلر کے چاہنے والے موجود ہیں جسے ہٹلر سے بچانے کیلئے میرے والد نے اپنی پوری زندگی قربان کی۔چند ہفتے پہلے ہی ٹیکساس مال میں ایک نیو نازی نے فائرنگ کرکے 8 افراد کو قتل کیا تھا۔وائٹ ہاؤس پر بھی ایک نیو نازی نے ٹرک لے کر چڑھ دوڑنے کی کوشش کی تھی لیکن وہ داخلی بیریئرز سے ٹکرا کر ہی رک گیا تھا۔