دوسروں کے لیے اُٹھا آواز۔۔۔اپنی باری کا انتظار نہ کر

چادرِ امن تار تار نہ کر
پشت پر آشتی کی وار نہ کر

دوسروں کے لیے اُٹھا آواز
اپنی باری کا انتظار نہ کر

سیکھ لے اب تو عشق کے آداب
زخم کھا زخمِ دل شمار نہ کر

وہ جو جلتے ہیں بزمِ غیر میں بھی
اُن چراغوں پہ انحصار نہ کر

رکھ زباں بند سامنے اُن کے
رکھ دے آئینہ شرمسار نہ کر

دل کی الجھن سمجھ سے باہر ہے
ذہن کو نذرِ انتشار نہ کر

کھول کر دیکھ چشمِ عقل بھی کچھ
صرف آنکھوں پہ اعتبار نہ کر

اب اماوَس ہے مستقل راغبؔ
چاند کا اور انتظار نہ کر

کلام :افتخار راغبؔ
جدہ، سعودی عرب