اسلام آباد ( وی او پی نیوز ) پاکستان پیپلز پارٹی (پی پی پی) کے چیئرمین بلاول بھٹو زرداری کا کہنا ہے کہ ہم جنگل کے بندروں سے ڈرنے والے نہیں ،اپوزیشن کے ممبران ایک نہتی لڑکی آصفہ بی بی سے ڈرتے ہیں۔میڈیا سے بات چیت کے دوران چیئرمین پی پی پی بلاول بھٹو زرداری نے کہا کہ پاکستان پیپلز پارٹی نے کل تاریخ رقم کی، صدر آصف علی زرداری نے
ساتویں بار پارلیمنٹ سے خطاب کیا۔صدر زرداری نے عوامی اور معاشی حالات سے ملک کو نکالنے کے لیے روڈ میپ دیا، اپوزیشن اپنا ذاتی فائدے نکالنے میں لگی ہے، بد قسمتی سے اپوزیشن نے اپنی ایک الگ تاریخ رقم کی ۔ پارلیمانی دائرے میں اپوزیشن کی تنقید کو ویلکم کرتے ہیں، اسپیکر نے کل کے احتجاج پر آج ایک فیصلہ کیا ہے۔چیئرمین پی پی پی نے کہا کہ ہم آمرو ں کے مقابلے کرتے ہیں، جنگل کے بندروں سے ڈرنے والے نہیں، جمہوری انداز میں تمام غیر جمہوری قوتوں کا ڈٹ کر مقابلہ کیا ہے۔ سیاست آپ کا حق ہے مگر خارجہ پالیسی پر سب کو ایک ہونا چاہیے، تمام انفرااسٹرکچر کو انوائرمنٹ فرینڈلی بنانا ہو گا۔
