گوہر اعجاز نے 50 فیصد انڈسٹری بند ہونے کی وجہ بتا دی

 فیصل آباد ( ایس ایم ایس )سابق نگران وفاقی وزیر تجارت اور چیف پیٹرن اپٹما گوہر اعجاز کا ایک اور حیران کر دینے والا بیان سامنے آ گیا ۔ فیصل آباد میں میڈیا سے گفتگو کرتے ہوئے انہوں نے کہا ہے کہ  50 فیصد انڈسٹری بند ہونے کی وجہ مہنگی بجلی ہے۔ 14 سال تجربے کے بعد کہہ رہا ہوں ان حالات میں صنعت چل ہی نہیں سکتی۔  فیصل آباد میں 25 لاکھ صنعتی مزدور ہیں، کس قدر بےروزگاری کا سیلاب ہے۔

 گوہر اعجاز نے کہا ہے کہ پاکستان صرف 40 خاندانوں کا نہیں، 40 خاندانوں کو بچانے کے لئے پورے ملک کو داؤ پر نہیں لگانا چاہئے، پاکستان کا ہر گھر بجلی کی وجہ سے پریشان ہے، صنعت کا پہیہ رکنے سے اکانومی کا پہیہ رک جاتا ہے۔ فیصل آباد پورے پاکستان کی صنعت کا دل ہے، صنعتکار ہونے کے ناطے اندازہ ہے کہ انڈسٹری بند ہونے کا دکھ کیا ہے،  صنعتیں بند ہونے میں سب سے بڑا ہاتھ بجلی کی قیمتوں کا ہے۔

گوہر اعجاز نے کہا کہ میں نے سب سے پہلے آواز اٹھائی کہ صنعتیں 16 سینٹ فی یونٹ پر نہیں چل سکتیں، میں نے صنعتوں کے لئے 9 سینٹ فی ڈالر کا ریٹ کروایا، بجلی کا نظام حکومت سے نہیں چل رہا، 1 لاکھ کروڑ روپے آئی پی پیز کو مفت دیئے جا رہے ہیں حکومت کا کام کاروبار کرنا نہیں ہے، آئی پی پیز سے ایسے معاہدے کئے گئے جو دنیا میں کہیں نہیں ہوئے، ایسے معاہدوں کے ہوتے ہوئے ہم دنیا کا مقابلہ نہیں کر سکتے، ایسے معاہدے پاکستان کی اکانومی سے خون چوس رہے ہیں، دنیا میں فی یونٹ 7 سے 9 سینٹ تک ریٹ ہے۔
اعجاز گوہر کا کہنا تھا کہ پاکستان کے عوام کے ساتھ زیادتی ہو رہی ہے، فیصل آباد اور صنعت کار رو رہے ہیں، ملک کے چاروں ستونوں کو کہتا ہوں کہ اپنا کردار ادا کریں۔