لاہور ( وی او پی نیوز ) وزیراعظم شہباز شریف نے لاہور میں پریس کانفرنس کرتے ہوئے چیئرمین پی ٹی آئی عمران خان پر قاتلانہ حملے کی تحقیقات چیف جسٹس پاکستان کی سربراہی میں کروانے کا مطالبہ کردیا۔وزیراعظم نے کہا کہ سپریم کورٹ کا فل کورٹ کمیشن واقعے کی تحقیقات کرے، عمران خان پر حملے کے واقعے کی مذمت کرتے ہیں، لیکن افسوسناک واقعے پر الزام تراشی اور گھٹیا
پن کا مظاہرہ کیا جارہا ہے۔ چیف جسٹس پاکستان فساد اور فتنہ ختم کرنے کے لیےفل کورٹ کمیشن بنائیں۔ فل کورٹ پر مبنی کمیشن ملک اور عوام کے لیے مفید ہے، میری التماس نہ مانی گئی تو آنے والے وقت میں سوالات اٹھتے رہیں گے۔ چیف جسٹس پاکستان سےدرخواست ہےکہ فل کورٹ کمیشن بنائیں، آپ جب بھی بلائیں گے میں عدالت میں پیش ہوں گا۔ان کا کہنا تھا کہ فل کورٹ کمیشن کے لیےجلد چیف جسٹس پاکستان کوخط لکھوں گا، کمیشن کا جو بھی فیصلہ ہو گا، میں اُسے قبول کروں گا۔شہباز شریف نے یہ بھی کہا کہ تاریخ اس دوراہے پر ہے کہ آج دودھ کا دودھ اور پانی کا پانی کرنا پڑے گا، انصاف کے ترازو میں عمران خان کو جب بھی ذرا سا جھٹکا لگا وہ اس کےمخالف ہوگئے۔مجھے پتا چلا ہے صحافی ارشد شریف کی والدہ نے میرا بنایا ہوا کمیشن تسلیم نہیں کیا ہے۔ چیف جسٹس سےدرخواست کروں گا کہ اس معاملے کو اس کمیشن کے سامنے پیش کریں۔
