راولپنڈی ( وی او پی نیوز ) پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے کہا ہے کہ سازشی عناصر کو کوئی جگہ نہیں دیں گے۔آرمی چیف نے ضلع خیبر کی وادی تیراہ کا دورہ کیا اور جوانوں کے ساتھ دن گزارا۔ آرمی
چیف کو آپریشنل تیاریوں اور بارڈر کنٹرول کے حوالے سے بریفنگ دی گئی۔آرمی چیف جنرل سید عاصم منیر نے جوانوں کی آپریشنل تیاریوں اور عزم کو سراہا۔اس موقع پر آرمی چیف جنرل سید عاصم منیر نے کہا کہ قبائلی عوام اور سیکیورٹی فورسز کی قربانیوں سے ریاست کی رٹ مضبوط ہوئی ہے اور مادر وطن کی ہر قیمت پر دفاع کو یقینی بنایا جائے گا۔انہوں نے کہا کہ قوم کے تعاون سے دہشت گردی کے خاتمے کی جنگ جاری ہے اور دیرپا امن واستحکام کو یقینی بنائیں گے جبکہ سازشی عناصر کو کوئی جگہ نہیں دیں گے۔آرمی چیف جنرل سید عاصم منیر نے کور ہیڈ کوارٹرز پشاور کا بھی دورہ کیا۔ انہوں نے یادگار شہداء پر پھول چڑھائے اور فاتحہ خوانی کی۔
