اسلام آباد ( وی و پی نیوز ) اسلام آباد ہائی کورٹ نے 1947ء سے اب تک وزرائے اعظم اور صدور کے توشہ خانے سے تحائف لینے پر جواب طلب کر لیا۔عدالتِ عالیہ کے جسٹس میاں گل حسن اورنگزیب نے 26 دسمبر کی سماعت کا تحریری حکم جاری کر دیا۔اسلام آباد ہائی کورٹ کی جانب سے حکومت کو ایک ماہ میں جواب دینے کا حکم دے دیا گیا۔عدالت نے اپنے تحریری حکم میں کہا ہے کہ پٹیشنر کے

مطابق 23 اپریل کو کابینہ ڈویژن کو معلومات کی فراہمی کی درخواست دی، 28 اپریل کو کابینہ ڈویژن نے جواب میں کہا کہ معلومات کلاسیفائیڈ ہیں، نہیں دے سکتے۔” جنگ ” کے مطابق تحریری حکم میں اسلام آباد ہائی کورٹ کا کہنا ہے کہ کابینہ ڈویژن کے فیصلے کے خلاف پاکستان انفارمیشن کمیشن نے اپیل سنی، کمیشن نے 29 جون کو کابینہ ڈویژن کو پٹیشنر کو معلومات دینے کا حکم دیا۔واضح رہے کہ عدالتِ عالیہ میں ایڈووکیٹ ابوذر سلمان خان نیازی نے معلومات کی فراہمی کی درخواست دائر کر رکھی ہے۔کمیشن کے 29 جون کے فیصلے پر عمل درآمد کی درخواست پر عدالت کا تحریری حکم جاری ہوا ہے۔