نئی دہلی ( مانیٹرنگ ڈیسک ) بھارت سے ایک تشویشناک خبر سامنے آئی ہے اور وہ یہ کہ ریاست اترپردیش کے بالیہ نامی علاقے کے ہسپتال میں اچانک اموات میں اضافہ ہوگیا ہے۔ بتایا جا رہا ہے کہ مریضوں کو بخار، سانس لینے میں تکلیف اور دیگر مسائل پر ہسپتال لایا گیا اور 72 گھنٹوں کے دوران 54
افراد موت کے منہ میں جا چکے ہیں۔ ہسپتال انتظامیہ نے سٹاف کو الرٹ کردیا ہے۔ہسپتال میں متعین ڈاکٹرز ان اموات کی وجہ ہیٹ ویو (شدید گرمی کی لہر) کو قرار دے رہے ہیں۔تاہم ان اموات کی تحقیقات کے لیے بنائی گئی کمیٹی کے لکھنو سے رکن اور سینئر ڈاکٹر نے ہیٹ ویو کو وجہ ماننے سے انکار کر دیا اور کہا کہ قریب کے دیگر اضلاع میں ایسی صورتحال نہیں، تاہم انہوں نے دعویٰ کیا کہ اسکی وجہ ناقص پانی کا استعمال ہوسکتا ہے۔حکام کے مطابق 400 افراد کو شدید گرم موسم کی وجہ سے گزشتہ 3 دنوں کے دوران ہسپتال لایا گیا، ان اموات پر مقامی محکمہ صحت مختلف وضاحتیں پیش کر رہا ہے۔ 15 جون سے یہ سلسلہ جاری ہے اور اس دن 20 افراد جبکہ اگلے دن 11 اور کل 23 اموات رپورٹ ہوئیں۔
