امریکی عوام اب لیبارٹری میں تیار کردہ مرغی کا گوشت کھائیں گے ، حیران کن تفصیلات سامنے آ گئیں

 نیو یارک ( مانیٹرنگ ڈیسک ) پاکستان میں مرغی کے گوشت کی قیمتیں آسمانوں سے باتیں کر رہی ہیں اور عوام کی پہنچ سے دور ہیں تو دوسری جانب امریکی عوام لیبارٹری میں تیار کردہ مرغی کا گوشت کھانےکی تیاری کر رہے ہیں۔بین الاقوامی میڈیا کی رپورٹ کے مطابق امریکی عوام جلد ہی لیبارٹری میں تیار کردہ مرغی کے گوشت کے ذائقے اور ذائقے کا تجربہ کرنے والے ہیں کیونکہ امریکی محکمۂ زراعت نے 2 کمپنیوں کو لیبارٹری میں گوشت کی

تیاری شروع کرنے کی اجازت دے دی ہے۔”جنگ ” کے مطابق یہ گوشت لیبارٹری میں جانور سے نہیں بلکہ اس کے خلیوں سے تیار کیا گیا ہے جسے اسٹورز تک پہنچنے میں ابھی کچھ وقت لگے گا تاہم اسے پہلے کچھ منتخب ریسٹورینٹس میں چکھایا جا سکتا ہے۔لیبارٹری میں تیار کیے گئے گوشت کو جسےکاشت کیا گیا گوشت بھی کہا جاتا ہے، اسے بڑے سائز کے بائیو ری ایکٹرز میں غذائی اجزاء ڈال کر جانوروں کے خلیوں کا استعمال کرتے ہوئے تیار کیا جاتا ہے۔گوشت تیار ہونے کے بعد کمپنیاں اسے جمع کرتی ہیں اور پروسیسنگ لائن میں منتقل کر دیتی ہیں۔ایک کمپنی کا کہنا ہے کہ لیبارٹری میں گوشت تیار کرنے کے لیے خلیات ایک فرٹیلائزڈ مرغی کے انڈے سے جمع کیے جاتے ہیں پھر ان کو خلیات بینک میں محفوظ کیاجاتا ہے جوکہ کم از کم 10 سال تک استعمال کیے جا سکتے ہیں۔ایک اور کمپنی کے مطابق، لیبارٹری میں تیار کردہ اس گوشت کا ذائقہ بالکل مرغی کے گوشت سے حاصل کیے گئے گوشت جیسا ہی ہوگا۔