ورلڈکپ کے شیڈول کا اعلان ہو گیا،پاکستان کے ٹورنامنٹ میں کتنے میچز ہونگے اور کب کب کھیلے جائیں گے ؟جانیے ،

لندن ( سپورٹس نیوز ) انتظار کی گھڑیاں ختم ہوئیں ،انٹرنیشنل کرکٹ کونسل (آئی سی سی) نے کرکٹ ورلڈ کپ کے آفیشل شیڈول کا اعلان کر دیا۔ایونٹ کا آغاز5 اکتوبر سے ہوگا جب کہ فائنل 19 نومبر کو کھیلا جائے گا، پہلا میچ دفاعی چیمپئن انگلینڈ اور نیوزی لینڈ کے درمیان بھارت کے شہر احمد آباد میں ہوگا۔پاکستان پہلا میچ 6 اکتوبر کو کوالیفائر ون کے خلاف حیدر آباد میں کھیلے گا۔15اکتوبر کو پاکستان بھارت کا مقابلہ احمد آباد میں ہوگا۔آئی سی سی مینز ون ڈے کرکٹ ورلڈکپ دس وینیوز پر کھیلا جائے گا۔پاکستان بھارت کے 5 مختلف شہروں میں 9 لیگ میچز کھیلے گا۔

 چھ اکتوبر: پاکستان بمقابلہ کوالیفائر نمبر 1۔12 اکتوبر: پاکستان بمقابلہ کوالیفائر نمبر 2

 پندرہ اکتوبر: پاکستان بمقابلہ انڈیا

 بیس اکتوبر: پاکستان بمقابلہ آسٹریلیا

 تیس اکتوبر: پاکستان بمقابلہ افغانستان

 ستائیس اکتوبر: پاکستان بمقابلہ جنوبی افریقا

 اکتیس اکتوبر: پاکستان بمقابلہ بنگلادیش

 چار نومبر: پاکستان بمقابلہ نیوزی لینڈ

 بارہ نومبر: پاکستان بمقابلہ انگلینڈ

دوسری جانب پی سی بی نے آئی سی سی کرکٹ ورلڈ کپ کے حوالے سے بیان جاری کیا ہے جس میں بورڈ کا کہنا ہے کہ پی سی بی کو دورہ انڈیا اور میچ

وینیوز کے حوالے سے حکومت پاکستان کی کلیئرنس درکار ہوتی ہے۔پی سی بی کا کہنا ہے کہ حکومت کی جانب سے ہمیں جو بھی ہدایت ملے گی ہم ایونٹ اتھارٹی آئی سی سی کو آگاہ کر دیں گے، آئی سی سی کو فیڈ بیک کے لیے بھجوائے جانے والے ڈرافٹ کے موقع پر آگاہ کیا گیا تھا۔

خیال رہے کہ ورلڈکپ میں جگہ بنانے کے لیے کوالیفائنگ راؤنڈ پہلے ہی شروع ہوچکا ہے، تین ہفتوں پر مشتمل یہ اہم ٹورنامنٹ فیصلہ کرے گا کہ کون سی ٹیمیں اکتوبر اور نومبر میں بھارت میں ہونے والے ورلڈ کپ کا حصہ ہوں گی، اس ٹورنامنٹ کے لیے ویسٹ انڈیز، زمبابوے، نیدرلینڈز، نیپال اور یو ایس اے کی ٹیموں کو گروپ اے میں شامل کیا گیا ہے۔گروپ بی میں سری لنکا، آئرلینڈ ، اسکاٹ لینڈ، عمان اور یو اے ای کو شامل کیا گیا ہے۔

واضح رہے کہ گزشتہ روز رواں برس بھارت میں شیڈول آئی سی سی کرکٹ ورلڈکپ 2023 کی ٹرافی ٹور کا منفرد انداز میں خلاء سے آغاز ہوا تھا۔ٹرافی کو زمین سے 1 لاکھ 20 ہزار فٹ بلندی پر خلا میں بھیجا گیا جہاں سے ٹرافی احمدآباد کے نریندر مودی اسٹیڈیم میں اتری۔آئی سی سی ورلڈکپ ٹرافی آج سے بھارت کے مختلف شہروں میں لے جائی جائے گی جبکہ ٹرافی 31 جولائی سے 4 اگست تک پاکستان کا دورہ کرے گی۔