اسد عمر کا سیاست مکمل طور پر چھوڑنے کا اعلان،پارٹی کو سائیڈ لائن کیا جا رہاہے، ترجمان تحریک انصاف

اسلام آباد ( وی او پی نیوز ) سابق وفاقی وزیر اسد عمر نے سیاست مکمل طور پر چھوڑنے کا اعلان کر دیا جبکہ دوسری جانب ترجمان تحریک انصاف شعیب شاہین وفاقی دارالحکومت میں پریس کانفرنس کرتے ہوئے کھل کر بول پڑے اور کہا کہ پی ٹی آئی کو سائیڈ لائن کیا جا رہا ہے ۔ تفصیلات کے مطابق سابق وفاقی وزیر اسد عمر نے مکمل طور پر سیاست چھوڑنے کا اعلان کر دیا ہےانہوں نے تحریکِ انصاف کی بنیادی رکنیت سے بھی استعفیٰ دے دیا۔اسد عمر نے سیاست چھوڑنے سے متعلق مائیکرو بلاگنگ ویب سائٹ ایکس پر ٹوئٹ کیا،انہوں نے اپنے ٹوئٹ میں لکھا ” میں نے سیاست کو مکمل طور پر

چھوڑنے کا فیصلہ کیا ہے۔ پہلےبھی کہہ چکا ہوں کہ ریاستی اداروں کے ساتھ تصادم کی پالیسی سے متفق نہیں ہوں اور ایسی پالیسیز ریاستی اداروں کے ساتھ شدید ٹکراؤ کا باعث بنی ہیں جو ملک کے مفاد میں نہیں۔ میں پی ٹی آئی کی بنیادی رکنیت سے بھی استعفیٰ دے رہا ہوں۔”اسد عمر نے اپنے ٹوئٹ میں اپنے حلقے والوں کا 2 بار الیکشن میں کامیاب کرنے پر شکریہ بھی ادا کیا اور مزید لکھا ” میں ان تمام لوگوں کا شکریہ ادا کرنا چاہتا ہوں جنہوں نے عوامی زندگی میں میرا ساتھ دیا، خاص طور پر میں این اے 54 کی ٹیم اور ووٹرز کا شکریہ ادا کرنا چاہتا ہوں جنہوں نے مجھے دو بار منتخب کیا، جس حلقے سے میں منتخب ہوا ہوں اس کی خدمت کرنے کی پوری کوشش کی ہے۔اللّٰہ پاک پاکستانی قوم پر اپنی رحمتیں نازل فرمائے۔

دوسری جانب پاکستان تحریکِ انصاف (پی ٹی آئی) کے ترجمان شعیب شاہین نے اسلام آباد میں پریس کانفرنس کے دوران کہا ہے کہ عوام جانتے ہیں پی ٹی آئی کو سائیڈ لائن کیا جا رہا ہے۔ کراچی میں ایک ورکر کنونشن کرنے جا رہے ہیں۔ کراچی ورکرز کنونشن کے لیے الیکشن کمیشن کو خط لکھا ہے۔ کرک میں سب نے جلسہ کیا لیکن پی ٹی آئی کو اجازت نہیں دی گئی۔علی نواز اعوان اور عامر ڈوگر کو گرفتار کیا گیا۔”جنگ ” کے مطابق ان کا یہ بھی کہنا ہے کہ الیکشن کمیشن کی ذمے داری ہے کہ لیول پلیئنگ فیلڈ دے، الیکشن کمیشن سے مطالبہ کرتے ہیں کہ سب کو انتخابات میں برابری کا موقع دیں۔