ممبئی میں 3 بڑے بینکوں کو دھمکی آمیز ای میل موصول،11 مقامات پر بم نصب،ای میل میں مزید کیا کچھ لکھا تھا ؟ جانیے

ممبئی ( مانیٹرنگ ڈیسک ) ممبئی میں ایک ای میل نے سیکیورٹی اداروں کی دوڑیں لگوا دیں ۔ تفصیلات کے مطابق بھارت کے  مصروف ترین شہر ممبئی میں 3 بڑے بینکوں کو دھمکی آمیز ای میل موصول ہوئی ہیں،اور اس ای میل میں شہر کے 11 مقامات پر بم نصب کرنے کا بھی بتایا گیا ۔دھمکی دینے والے نے ای میل میں قومی مالی معاملات میں گھپلے بازی پر بھارتی وزیر خزانہ نرملا سیتارامن سے مستعفی ہونے کا بھی مطالبہ کیا ہے۔پولیس کے مطابق

مذکورہ بالا ای میل ریزرو بینک آف انڈیا کے گورنر کو ان کی ای میل آئی ڈی سے تقریباً صبح 10بجکر 50 منٹ سے دوپہر 1 بجکر 30 منٹ کے دوران بھیجی گئی۔آر بی آئی کے علاوہ ایچ ڈی ایف سی ہاؤس چرچ گیٹ اور آئی سی آئی سی آئی بینک ٹاور بیندرا کورلا کمپلیکس کو موصول ہوئی تھی۔”جنگ ” کے مطابق ای میل میں تحریر تھا کہ ہم نے 11 بم ممبئی آر بی آئی کے ساتھ نجی شعبے کے بینکوں میں مختلف جگہوں پر نصب کیے ہیں، ان بینکوں نے بھارتی تاریخ کی سب بڑی جعل سازی کی ہے۔ای میل کے مطابق اس جعل سازی میں ریزرو بینک آف انڈیا کے گورنر شکتی کانتا داس، وزیر خزانہ نرملا سیتا رامن، اعلیٰ ترین بینک افسران اور بعض معروف بھارتی وزراء ملوث ہیں، ہمارے پاس اس کے کافی ٹھوس ثبوت موجود ہیں۔بھارتی پولیس کا کہنا ہے کہ یہ اطلاع افواہ پر مبنی تھی تاہم  اس حوالے سے کیس درج کرکے مزید تفتیش شروع کردی گئی ہے۔پولیس حکام کے مطابق مرکزی بینک کے گارڈز کی مدعیت میں نامعلوم شخص کے خلاف مقدمہ درج کیا گیا ہے جبکہ بم کی دھمکی موصول ہونے کے بعد سیکیورٹی سخت کردی گئی ہے۔بھارتی پولیس نے تلاشی کے بعد تمام 11 مقامات کو کلیئر قرار دے دیا۔