پاکستان سیاسی نااہلی اور معاشی تباہی کے دہانے پر ہے،فنانشل ٹائمز نے حیران کن انکشافات کر دیئے

لندن ( مانیٹرنگ ڈیسک )معروف برطانوی جریدے فنانشل ٹائمز نے پاکستانی معیشت کو درپیش مشکلات پر رپورٹ شائع کی ہے اور اس رپورٹ میں خطرے کی گھنٹی بجا دی ہے۔ فنانشل ٹائمز ایڈیٹوریل بورڈ نے پاکستان کے ڈیفالٹ اور مستقبل کی پیشرفت کا جائزہ لیا۔رپورٹ کے مطابق پاکستان تباہی کے دہانے پر ہے، جوہری طاقت اور اس کے قرض دہندگان ڈیفالٹ سے بچنے کیلئے سخت

اقدامات اٹھا رہے ہیں۔ ملک کی کرنسی بری طرح گرچکی ہے، گزشتہ ماہ کے آخر میں پاکستان کے زر مبادلہ کے ذخائر کم ہو کر صرف 3.7 ارب ڈالر رہ گئے۔رپورٹ میں کہا گیا کہ چین، آئی ایم ایف اور پیرس کلب کو پاکستان کو قرضوں کی تنظیم نو کے مذاکرات میں تیزی لانے کی ضرورت ہے۔
فنانشل ٹائمز نے اپنی رپورٹ میں کہاہے کہ پاکستان اپنی تاریخ کے مشکل ترین دور سے گزر رہا ہے ، ریاست سیاسی نااہلی، تباہ حال معیشت ، دہشتگردی اور سیلاب جیسے مسائل میں گھری ہے ، ناقص طرز حکمرانی اور بدعنوانی کاسلسلہ دہائیوں سے جاری ہے ، سیاسی جماعتیں متوقع انتخابات کو ملکی بہتری کے بجائے تنازع کی شکل دے سکتی ہیں۔ پاکستان میں سری لنکاجیسی صورتحال پیدا ہونے کا خدشہ ہے ، پاکستان کے سیاستدانوں کو عوام کو ترجیح دینی چاہئے ، عالمی مالیاتی اداروں کو پاکستان کو ڈیفالٹ سے بچانے کی ضرورت ہے ،چین کو بھی پاکستان سے قرض واپسی میں لچک کا مظاہرہ کرنا چاہئے۔