لاہور ( وی او پی نیوز ) چیئرمین تحریک انصاف عمران خان نےانٹرنیٹ پر خطاب کرتے ہوئے بتا دیا کہ ان کی جماعت کو چھوڑ کر جانیوالے کیا کر رہے ہیں ؟ عمران خان نے کہا ہے کہ مجھے جو سمجھ آیا ہے کہ ایک کنگز پارٹی بنائی جارہی ہے، جو لوگ پی ٹی آئی سے نکلے ہیں انہیں اس کنگز پارٹی میں ڈال دیں۔ مجھے سمجھائیں تو صحیح کوئی روڈ میپ تو ہوگا جانا کہاں ہے؟ پارٹی چھوڑ کر جانے والوں میں ایسے بھی ہیں جو نئی پارٹی کیلئے لابنگ کر رہے ہیں، کئی لوگ جو پارٹی چھوڑ کرگئے ان کو ہمیں ٹکٹ ہی نہیں دینا تھا۔ میں نے پوری کوشش کی ہے کہ نظریاتی لوگوں کو ٹکٹ دیے جائیں، پنجاب
میں زیادہ تر لوگ نظریے پر کھڑے ہیں۔ تحریک انصاف پر اس وقت جو ظلم کیا جارہا ہے، اس کی مثال نہیں ملتی، یہ ہمارے ٹکٹ ہولڈرز کے پیچھے پڑے ہوئے ہیں، ہمارے کئی ٹکٹ ہولڈرز نے پارٹی چھوڑ دی ہے۔چیئرمین پی ٹی آئی کا مزید کہنا تھا کہ ہماری قیادت کے گھر، کاروبار اور فارم ہاؤس توڑے جا رہے ہیں، پارٹی قیادت کو گھر کی خواتین اور بچوں کو دھمکیاں دی جا رہی ہیں، ان کو علم ہے کہ گرفتار ہونے والی کوئی عورت جلاؤ گھیراؤ میں ملوث نہیں۔ایف آئی اے کو پی ٹی آئی پر کیس ڈھونڈنے اور انتقامی کارروائی کے علاوہ کوئی کام نہیں، ایف آئی اے بھول گئی کہ شہباز شریف کا 16 ارب روپے کا کرپشن کیس ہے۔ چیئرمین نیب کی جگہ جسے لائے اس کا کام صرف تحریک انصاف پر کیس کرنا ہے۔ تحریک انصاف کو توڑنے کیلئے ملک کے اداروں کو تباہ کیا جا رہا ہے، جن اداروں کو جرائم روکنے تھے ان کو پی ٹی آئی ختم کرنے پر لگا دیا۔
