کراچی ( ایس ایم ایس)چیئرمین پیپلز پارٹی بلاول بھٹو زرداری آئینی عدالتیں بنانے کے فیصلے کے حوالے سے کھل کر سامنے آ گئے ۔سندھ ہائی کورٹ بار میں وکلاء سے خطاب کرتے ہوئےچیئرمین پیپلز پارٹی بلاول بھٹو زرداری کا کہنا ہے کہ آئینی عدالت ضروری ہے، مجبوری ہے، آئینی عدالت بنا کر رہیں گے۔ ہمیں کہا جاتا تھا کہ آپ اتنے کرپٹ ہو کہ آپ پر آئین اور قانون لاگو نہیں ہوتا۔ جمہوریت کے لیے ہماری نسلوں نے قربانیاں دی ہیں، اسی چارٹرڈ آف ڈیموکریسی میں ہم نے کہا کہ 1973ء کے آئین کو بحال کرنا پڑے گا، اسی چارٹرڈ آف ڈیموکریسی پر بے نظیر بھٹو اور نواز شریف کے دستخط تھے۔
“جنگ ” کے مطابق بلاول بھٹو کا کہنا ہے کہ جب ہم 18 ویں ترمیم پاس کر رہے تھے بے نظیر بھٹو جانتی تھیں کہ کتنا ٹوٹا پھوٹا عدالتی نظام ہے، ایک انصاف دینے والے ادارے نے عدالتی قتل کا۔ ضیاء الحق کا دور شہید محترمہ بینظیر بھٹو نے دیکھا، ہر سیاسی کارکن پر تشدد ہوا، شہید بے نظیر بھٹو کو پتہ تھا کہ ہمارا نظام ٹوٹا ہوا تھا، اس وقت افتخار چوہدری انقلابی نہیں پی سی او جج تھے، کوئی ڈیم والا جج نہیں تھا۔
ان کا کہنا ہے کہ اس وقت فیصلہ کیا تھا کہ آئینی عدالت بنیں گی تو لوگوں کو انصاف ملے گا، اس وقت عدالتیں پکوڑوں اور ٹماٹر کی قیمت طے کر رہی تھیں۔
